سلطان احمد پاکستان کے ممتاز صحافی سلطان احمد 1922ء میں مدراس (چنائی) میں پیدا ہوئے۔ تری وندرم یونیورسٹی سے تعلیم مکمل کرنے کے بعد 1947ء میں پاکستان آگئے جہاں ٹائمز آف کراچی کے نامہ نگار کے طور پر خدمات انجام دینی شروع کیں۔ قائداعظم اور لارڈ ماؤنٹ بیٹن کی پریس کانفرنسوں میں شرکت کرنے کا اعزاز بھی حاصل ہوا۔ چند برس بعد کراچی سے نکلنے والے شام کے انگریزی روزنامے لیڈر کی ادارت سنبھالی۔ 1972ء میں نیشنل پریس ٹرسٹ کے اخبار مارننگ نیوز کے مدیر بنے۔ 1977ء سے 1979ء تک کراچی کے مشہور انگریزی روزنامے سن کے مدیر رہے۔بعدازاں روزنامہ ڈان میں ثقافت، معاشیات اور تجارتی امور پرکالم نگاری کا سلسلہ شروع کیا۔14 اگست 2009ء کو حکومت پاکستان نے صدارتی تمغہ برائے حسن کارکردگی عطا کرنے کا اعلان کیا تھا مگر یہ اعزاز وصول کرنے سے پہلے 2 مارچ 2010 ء کو خالق حقیقی سے جاملے۔ کراچی میں وفات پائی اورمحمود آباد کے قبرستان میں آسودہ خاک ہوئے۔

نذیر لغاری پاکستان کے ممتاز صحافی نذیر لغاری 11 نومبر 1955ء کو راجن پور میں پیدا ہوئے۔ وہ انتہائی کم عمری میں کراچی آگئے جہاں انھوں نے اپنے تعلیمی مراحل مکمل کیے۔ صحافتی کیرئیر کا آغاز 1981 میں روزنامہ ’’نوائے وقت‘‘ سے کیا۔ کئی اخبارات میں کام کرنے کے بعد 1994 میں روزنامہ ’’عوام‘‘ سے بطور مدیر منسلک ہوئے۔ 2012ء میں روزنامہ ’’جنگ‘‘ کے مدیر بنے۔ 2015ء میں بول میڈیا گروپ سے وابستہ ہوئے۔ کئی کتابوں کے مصنف ہیں جن میں سیاست دوراں اور تاریخ بولتی ہے کے نام سرفہرست ہیں۔ حکومت پاکستان نے ان کی خدمات کے اعتراف میں 14 اگست 2012 ء کو انھیں صدارتی تمغہ برائے حسن کارکردگی عطا کیا۔

ولی خان بابر پاکستان کے ممتاز صحافی ولی خان بابر 5 اپریل 1982ء کو پیدا ہوئے۔ ان کا تعلق بلوچستان کے علاقے ژوب سے تھا۔ انہوں نے جامعہ کراچی سے بین الاقوامی تعلقات میں ماسٹرز کی سند حاصل کی اور جیو ٹی وی سے وابستہ ہوئے۔ 13 جنوری 2011ء کو جب وہ اپنی دفتری ذمہ داریاں ادا کرنے کے بعد اپنے گھر جارہے تھے، تو انہیں نامعلوم افراد نے قتل کردیا۔ حکومت پاکستان نے ان کی خدمات کے اعتراف میں 14 اگست 2013 ء کو انھیں صدارتی تمغہ برائے حسن کارکردگی عطا کیا۔ ولی خان بابرژوب میں آسودہ خاک ہیں۔

ادریس بختیار پاکستان کے ایک معروف صحافی ادریس بختیار صحافتی زندگی کی ابتدا حیدر آباد سے شائع ہونے والے انگریزی روزنامہ انڈس ٹائمز  سے کی۔ پھر پاکستان پریس انٹر نیشنل (پی پی آئی) کے کراچی ڈیسک پر کام کیا۔ اپنے دور کے بااثر اور مشہور انگریزی زبان کے ہفت روزہ پاکستان اکنامسٹ ، انگریزی زبان کے معتبر ماہنامے ہیرالڈ کے علاوہ کول کتہ کے انگریزی کے بڑے اخبار ٹیلی گراف کے لئے بھی کام کیا اور سعودی عرب کے انگریزی اخبار عرب نیوز کے لئے سعودی عرب بھی گئے۔ انہوں نے نشریاتی دنیا کے دو بڑے نامور اداروں وائس آف امریکہ اور بی بی سی کے لئے طویل عرصے خدمات انجام دیں۔ ان دنوں وہ جیو نیوز کی ایڈیٹوریل ڈپارٹمنٹ کے سربراہ ہیں۔ حکومت پاکستان نے ان کی خدمات کے اعتراف میں انھیں 14 اگست 2014 ء کو صدارتی تمغہ برائے حسن کارکردگی عطا کیا تھا۔