الیگژینڈر رابرٹ وکٹر رولو پاکستان کے معروف فوٹو گرافر الیگژینڈر رابرٹ وکٹر رولو8 نومبر 1910ء کو لندن میں پیدا ہوئے تھے۔ ان کا شمار پاکستان کے مشہور پورٹریٹ فوٹو گرافرز میں ہوتا ہے۔ تحریک پاکستان کے دنوں میں انہوں نے اس تحریک کی بڑی یادگار تصاویر کھینچیں جو پاکستان کا ایک بہت اہم اثاثہ ثابت ہوئیں۔ 14 اگست 1981ء کو حکومت پاکستان نے انہیں صدارتی تمغہ برائے حسن کارکردگی عطا کیا۔ الیگژینڈر رابرٹ وکٹر رولو2 فروری 1995ء کو لاہور میں وفات پاگئے۔ وہ گورا قبرستان، جیل روڈ، لاہور میں آسودۂ خاک ہیں۔

ایف ای چودھری پاکستان کے مشہور پریس فوٹوگرافر ایف ای چودھری کا پورا نام ایک روایت کے مطابق فضل الٰہی اور دوسری روایت کے مطابق فاسٹن ایلمر چودھری تھا اور وہ 15 مارچ 1909ء کو پیدا ہوئے تھے۔ وہ 1965ء کی جنگ کے ہیرو سیسل چودھری کے والد تھے اور صحافتی اور سماجی حلقوں میں چاچا چودھری کے نام سے معروف تھے۔ ایف ای چودھری نے 1935ء میں سول اینڈ ملٹری گزٹ ، لاہور سے بحیثیت فوٹوگرافر اپنے کیرئیر کا آغاز کیا۔ بعد ازاں وہ السٹریٹڈ ویکلی آف انڈیا اور اسٹیٹسمین، کلکتہ کے لیے بھی فری لانسنگ کرتے رہے۔ اس دوران انھوں نے تحریک پاکستان کے اہم لمحات کو بھی اپنے کیمرے میں عکس بند کیا۔ 1949ء سے 1973ء تک وہ پاکستان ٹائمز سے منسلک رہے جہاں انھیں میاں افتخار الدین، فیض احمد فیض اور مظہر علی خان کے ساتھ کام کرنے کا اعزاز حاصل ہوا۔ 14 اگست 1986ء کو انھیں حکومت پاکستان نے صدارتی تمغہ برائے حسن کارکردگی عطا کیا تھا۔ اس کے علاوہ انہیں 1970ء میں تمغہ خدمت اور 1992ء میں تحریک پاکستان گولڈ میڈل سے بھی نوازا گیا تھا۔ 2009ء میں ان کی سوویں سالگرہ کے موقع پر ان کے سوانحی انٹرویو پر مبنی کتاب ’’اب وہ لاہور کہاں‘‘ اشاعت پذیر ہوئی تھی۔ 15 مارچ 2013ء کو ایف ای چودھری اپنی ایک سو چارویں سالگرہ کے دن لاہور میں وفات پاگئے۔

 ضیغم زیدی پاکستان کے نامور پریس فوٹوگرافر ضیغم زیدی کا پورا نام سید ضیغم حسین زیدی تھا اور وہ مظفر نگر میں پیدا ہوئے تھے۔ وہ روزنامہ جنگ، پاکستان ٹائمزاور مساوات سے وابستہ رہے۔ وہ ذوالفقار علی بھٹو اور محترمہ بے نظیر بھٹو کے ذاتی فوٹو گرافر تھے۔ انہیں ایوب خان کے دور حکومت، جنگ ستمبر، شملہ معاہدے اور اسلامی سربراہ کانفرنس کی تصاویر کھینچنے کا اعزاز حاصل تھا۔ حکومت پاکستان نے ضیغم زیدی کو 14 اگست 1990ء کو صدارتی تمغہ برائے حسن کارکردگی عطا کیا تھا۔ان کا انتقال 12 ستمبر 2006 کو ہوا۔